Svanhildur Árnadóttir

Í skólanum hans Jakobs eru um 350 nemendur.Mér finnst þægileg tilhugsun að skólinn skuli ekki vera fjölmennari en það. Jakob þarf að vera mættur kl:8.30 en skólinn byrjar kl:8.50 og honum lýkur ekki fyrr en 15.30. Þetta er dálítið langur og hlýtur að vera erfiður  vinnudagur fyrir fimm ára dreng,  en hann stendur sig með stakri prýði þessa fyrstu skóladaga og vonandi verður svo áfram. Allar góðar vættir veri með ykkur

Jæja, þá er maður komin til Ameríku. Ekki gekk það alveg snuðrulaust að komast inn í landið. Við eftirlitið á Kennedyflugvelli í New York var Ninni, já, ég segi og skrifa Ninni, beðinn að koma afsíðis til frekari skoðunar. Þeim leist ekki alveg á þennan íslenska íhaldsmann, töldu ábyggilega að þarna væri mættur eldrauður "kommi " ef ekki "krimmi" frá Íslandi, nema hvorutveggja væri. Eftir ítarlega skoðun í hliðarherbergi var Ninna sleppt og hann boðin velkominn til Ameríku, en þetta var þó nokkur eldraun.  Það er ótrúleg stærð á Kennedy-flugvelli. Til að komast leiðar sinnar ferðast maður í lest innan vallarins. Við áttum tengiflug til St. Louis. Við misstum af því flugi en Gummi gat reddað flugi til Chicago, svo áætlun breyttist heldur hjá okkur. Við vorum reyndar á biðlista en miklar líkur taldar á að komast með. Fljótlega vorum við kölluð út í vél. Þegar allt var klárt til flugtaks tilkynnti flugstjórinn að töf yrði á að komast í loftið, þar sem óveður væri í háloftum og miklar eldingar. Við sátum í fjóra tíma í vélinni þar til hún fór á loft. Jakob og Oddur Atli stóðu sig eins og hetjur í þessum þrengingum. Til Chicago komust við um miðnætti að staðartíma og fengum gistingu og það voru vægast sagt þreyttir og slæptir ferðalangar sem lögðust til svefns þetta kvöld.

Daginn eftir var vaknað í bítið snæddur morgunverður að hætti Kanans síðan flengst á flugvöllinn til að ná flugi til St. Louis. Frá St. Louis var svo leigður 12-manna bílaleigubíll. Farangurinn og fylgdarlið var hvílíkur að ekki dugði minni bíll undir liðið. Gummi keyrði sem herforingi væri og til Columbia komust við heilu og höldnu föstudaginn 15. ágúst kl.17.00. Ferðalagið tók með gistingu yfir blánóttina 40 tíma. Mikil var gleðin að koma á Freeport og sjá nýja fallega heimilið. Það er ekki afvötnunarstöðin sem íslendingar sóttu sér til þurrkunar og heilsubótar hér áður fyrr, nei,nei gatan þar sem Colimbíufararnir búa við heitir þessu kunnuglega nafni Freeport Way 5901.  Húsið er flott og ætti ekki að væsa um fjölskylduna næstu árin.

Nágannarnir eru vinsamlegir og gatan er ótrúlega hljóðlát og hrein. það er eins og allt standi í stað og allt sé á sínum stað. Ég get eiginlega ekki lýst fyrstu tilfinningunum við komuna hér, eitthvað minnti mig á bíómynd með Jim Carrey þar sem hann lifði í gervi-heimi.

Oddur Atli dafnar vel, Jakob Máni er í góðum gír og líkar vel í skólanum. Hrafnhildur er öll að hressast og Gummi er kominn í námsham.

Ég bið allar góðar vættir að vernda ykkur.

 

Kristján og co eru komin í heimsókn. Lítill tími gefst til að blogga en ég ætla að dúndra inn nokkrum myndum. Það er  eins gott að vera beggja megin á flakki og  hafa gott eftirlit með sumum. Ásókn pilta og sölumanna er nokkur  og  ekki geta þeir leynt aðdáun sinni  á  rauðhærðri snót. Það er mikið fjör og mikið gaman hjá okkur.  Sólaráburður ber háar tölur í kotinu núna svo vanlíðan fari ekki um neinn enda heillar ströndin  á hverjum degi, þar er alla veganna smá gola en því er ekki fyrir að fara  heima við hús.

Allar góðar vættir verndi ykkur og blessi.

Vinur Davíðs er komin í heimsókn til mömmu og pabba. Hún mætti hér galvösk og hress að vanda. Fljótlega rann þó á hana einhverskonar óráð sem við höldum að hafi orsakast af völdum hitans. Það er löngu sannað að rauðhærðir og freknóttir þola  hitann verr en gráhærðir og hrukkóttir og þurfa þeir því að fara fjarska,fjarska varlega í sólinni. Óráðið hjá stelpunni lýsti sér þannig að þegar við vorum á ferð okkar í gær til Torreveja þurftum við að leggja bílnum í undirgöng sem henni fannst vera eins og úr verstu glæpamynd. Fór hún að rugla um það hvað ég væri fær og flynkur bílstjóri og ef að hún þyrfti að keyra í svipuðum aðstæðum myndi hún bara grenja og ekkert vita í sinn haus. Hún uppástóð það líka einn daginn að við hefðum keyrt framhjá kirkjugarði sem hún vildi endilega fá að skoða, það væri svo skemmtilegt að skoða slíka garða.(hvílíkur húmor) Það veit sá sem allt veit að við höfum engan kirkjugarð séð hér í nágrenninu. Við vissum í fyrstu ekki hvernig ætti að bregðast við en tókum bara á það ráð að leyfa henni að fara í leik-tæki í Habaneras og viti menn það bráði smá saman af henni þetta óráð og hún tók kæti sína á ný og er nú alveg orðin eðlileg sem lýsir sér þannig að hún vill bara vera í búðum og versla eitthvað fallegt.

Hún trúði mér fyrir því að hún ætlaði sér að slá allavega Dodda út í taninu. Freknum hefur fjölgað til muna hjá henni og rauðir blettir eru hér og þar um líkamann. Fótleggir eru enn fölir en bringan er orðin eldrauð eins og ný-útsprungin jólarós. Set inn fleiri myndir.

Megi allar góðar vættir lýsa vegi ykkar.

Í ýmsu hefur verið að snúast síðustu daga. Helga kom hér og var í viku. Hún var að versla inn í íbúðina sem hún og Jói keyptu ásamt Magga vini þeirra. Við hjónin aðstoðuðum hana eftir bestu getu við innkaupin og flutningana. Ég var einkabílstjóri og sérlegur ráðgjafi. Ninni var leiðangurs-og hleðslustjóri. Við lóðsuðum Helgu í helstu verslanir og hún var ekki með neitt fum né fát var fljót að ákveða sig og gekk verslunin  bæði fljótt og vel fyrir sig. Við tróðum í bílinn eins og gengið gat og stundum var ansi plásslítið svo varla var hægt að koma Helgu fyrir í bílnum. Það bjargaðist þar sem hún er ekki plássfrek.

Íbúðin er orðin vel og fallega útbúin og óskum við  eignarhaldsfélaginu HMJ til hamingju með íbúðina og þökkum fyrir góðan mat á Puccini.

Þá eru Allý, Doddi og börn farin heim á klakann. Tan-keppnin var ekkert voða spennandi.Fljótlega kom í ljós að Allý myndi rúlla þessari keppni upp. Börnin fylgdu fast á hæla hennar. Doddi varð þó nokkuð freknóttur og það finnst mér alltaf svo vinalegt og sætt. Niðurstaða er að allir hafi sigrað. Á meðan Helga var hér ætlaði hún að fá að vera þátttakandi í keppninni.  Við nána skoðun kom í ljós að hún hafði verið í tan-sprautumeðferð á Dalvík og var snarlega dæmd frá keppni.  Ég bið alla góða vætti að vernda ykkur