Svanhildur Árnadóttir

8.9.2008 | 15:20

Columbia Missouri.

Við höfum nú séð nokkurn hluta af borginni. Gummi hefur transsportað með okkur m.a. í nokkra garða og útivistarsvæði. Columbia státar af mörgum fallegum görðum. Umhverfi borgarinar er mjög fallegt og gróðursælt. Tré og skógur út um allt. Gróðurinn virðist ekki eiga erfitt uppdráttar, veðursældin er slík. Mikill hiti og raki. Hitastigið hefur verið 30 gráður og gott betur þar til fyrir nokkrum dögum að hitinn snarlækkaði. Í þrígang á þremur vikum hefur komið hellirigning með miklum þrumum og eldingum. Mér var fyrst ekki um sel, þetta var sterkara enn á Spáni. Þrumurnar voru háværari og eldingarnar virtust nær. En ástæðulaust að vera hræddur. Það eina sem veðráttan gerði okkur var að pínu-lítill froskur kom á planið hjá okkur bakdyramegin. Hann hefur heimsótt okkur tvisvar síðan og verður áreiðanlega heimilisvinur til framtíðar.

Stephens Park er mjög fallegur garður. þar er nokkuð stórt vatn þar sem hægt er að veiða á ákveðnum stað en svo má synda og svamla á öðrum stað og þar er lítil tilbúin baðströnd, eini staðurinn þar sem ég hef séð fólk liggja í sólbaði.(Kaninn notar víst sólstofur) Við Jakob fengum okkur sundsprett í blíðunni og lékum okkur aðeins. Í garðinum er líka tilbúið vatnasvæði sem gaman er að leika í fyrir vatnsdýrkendur og ungt fólk á öllum aldri.

Við fórum í skrúðgarð á dögunum. Í garðinum eru á þriðja hundrað trjátegundir og hvílik tré maður lifandi! Fegurð þeirra er slík að maður fellur í stafi. Í garðinum eru líka fjöldinn allur af fjölærum plöntum. Ekki veit hvort þær eru sjaldgæfar en fallegar eru þær. Í garðinum er lítil tjörn þar sem litríkir fiskar synda um og gleðja alla sem leið eiga hjá.

Um daginn keyrðum við nokkra kílómetra útfyrir borgina, að friðlandi sem ég man ekki alveg hvað heitir. Þar er umhverfið fallegt og má sjá sjaldgæfa fugla og villt dýr ef rétt er að farið og heppnin er með og sjónaukinn. Hér koma myndir frá friðlandinu.Strákarnir dafna, vel eru frískir og glaðir. Allar góðar vættir verndi ykkur. Heart